Бурни реакции предизвика во јавноста одлуката цената на електричната енергија да се зголеми се 7,4 отсто. Според претседателот на Регулаторната комисија за енергетика (РКЕ) Марко Бислимоски поскапување на струјата побарале сите електро-енергетски компании заради проблемите што ги предизвика кризата со коронавирусот Ковид-19.

Бислимовски вчера истакна дека ЕСМ има намалување на приходите од продажба на вишоци на електрична енергија од 17 милиони евра, а МЕПСО намалување на приходите од 11 милиони евра.

Сепак за многумина ваквата одлука е вид манипулација со граѓаните. Голем дел од јавноста смета дека власта чекала да заврши изборниот процес, па по изборите да удри по џебот на граѓаните со ново поскапување во услови на коронакриза кога граѓаните се уште се соочуваат со бројни економски проблеми.

Поранешниот советник во Министерството за финансии Бранимир Јовановиќ на својот фејсбук направи кратка споредбена анализа со неколку европски држави и нивната стратегија во однос на енергетскиот сектор во време на коронакриза, а во насока на поскапувањето на струјата во Република Македонија од 7%.

– Шпанија за времетраењето на кризава обезбеди гарантиран пристап до струја, вода и гас за сиромашните, дури и ако не плаќале сметки. Италија ги суспендираше сметките за струја, гас, вода и ѓубре на 2 месеци. Белгија им даде на домаќинствата до 100 евра за сметки за струја и 75 евра за сметки за гас. Словенија ја намали цената на струјата за домаќинствата и малите фирми за 20%. Кипар ја намали цената на струјата за 10% на 3 месеци. Македонија ја зголемува цената на струјата за 7,4%, а има највисока сиромаштија и невработеност во Европа, пишува Јовановиќ.

-Зборувајте ми дека е оправдано поскапувањето на струјата, тивко, полека, пишува тој на Фејсбук.

Регулаторната комисија за енергетика да ја преиспита одлуката и да не дозволи покачување на цената на струјата за домаќинствата, бара партијата ДОМ.

Од ДОМ велат дека во време на корона криза кога граѓаните се соочуваат со егзистенцијални проблеми, поскапувањето на струјата ќе предизвика дополнително оптеретување на нивниот домашен буџет.

-Потребно е ЕСМ и МЕПСО да ги намалат оперативните трошоци на работењето, а ЕВН како универзален снабдувач да ја намали маржата на профит, за да се добие поевтина електрична енергија што ќе рефлектира со пониски сметки за струја. ЕСМ мора интензивно да инвестира во обновливи извори на енергија за во иднина да биде конкурентен на пазарот, велат од ДОМ од каде нагласуваат дека зголеменото искористување на обновливите енергии, пред се од сонцето, за производство на електрична енергија од страна на домаќинствата и компаниите, како и зголемената енергетска ефикасност на објектите, ќе овозможи пониски цени на струја, намалување на загадувањето и климатските промени.

-Прво ме закрпија со 50% повисока сметка за јуни, а сега господата покачуваат цена. Што поскапе при производството на струја за да поскапи и цената? – Ништо. Ама мора да има за плати за тие “избраните по стручност и неопходни” стотици, па и илјадници плакатолепачи, партиски ботови и медиокритети, швалерки и швалери од сите раси, вери и партии во МКД, напикани во ЕСМ и МЕПСО. Да има за скап мебел, за “служебни патувања”, ручеци, вечери, одмори… Е затоа поскапе струјата. Одамна знам дека ниту срам имате ниту разбирачка. Образ ѓон! Ама усул бе малку, полно луѓе едвај крај со крај крпат а допрва сметките ќе стигаат, пишува Чанчаревиќ.

-Не ветија, ама остварија повисока цена на струјата. Она што оваа влада го спроведе како институционален поткуп ќе им биде одземено на граѓаните преку повисоките сметки за струја. Евтина тарифа за струјата со која толку многу се фалеа ќе биде неколкукратно повеќе наплатена од џебот на граѓаните. Ова е сериозен удар врз граѓаните. Бандитизмот на оваа власт е во секоја пора, а криминалот и празната каса на државните институции ќе се покриваат со парите на народот, кредитите веќе не помагаат. И затоа покажаа дека само во криминал и грабеж можат уште повеќе и уште подобро!, стои во неговата објава на Фејсбук.

Цената на електричната енергија за домаќинствата поскапува за 7,4 отсто, а остануваат за користење ниска и висока тарифа односно евтината и скапа струја.