„Ги продаваме инструментите за да преживееме, близу 20.000 луѓе се оставени без егзистенција од почетокот на корона-кризата до денес“, велат музичарите кои неодамна истапија со барања до Комисијата за заразни болести и до власта да се најде решение за нивната дејност, која е речиси комплетно згасната за време на епидемијата, пренесува „ТВ 21“.

„ТВ 21“ имаа дебата со Гоце Стевковски, претседател на Здружението за џез-музичарите на Македонија, Петар Младеновски, фронтмен на групата „Суперхикс“ и член на Здружението за унапредување на правата на музичарите, и Џон Илија Апелгрен, џез-вокалист, дебатираа за според нив нелогичните мерки што ги спроведува власта и селективниот однос кога станува збор за примена на мерките за заштита а од кои настрадала музичката дејност. Тие сметаат дека се колатерална штета на поединци кои не ги почитуваа мерките, како случаите со турбофолк-забавите во некои локали.