Денеска на белградскиот аеродром пристигнаа првите вакцини на производителот Фајзер. Во контигентот се 4.800 дози од вакцината, а според претходните најави, тие ќе бидат наменети првенствено за лицата кои се сместени во домовите за стари лица.
Авионот со вакцините слета малку порано од предвиденото на аеродромот „Никола Тесла“, а вакцините се веќе превеземени, односно истоварени. Инаку, Србија е првата земја во регионот во која пристигна вакцината на компаниите „Фајзер“ и „Бионтек“.
Што се однесува пак до нашата држава, утрово на владината седница во Софија на која свое обраќање имаше и министерот за здравство Венко Филипче, беше одлучено Бугарија да донира дел од своите вакцини и за нашата држава. Со оваа одлука во нашата земја вакцини ќе стигнуваат во исто време како и во останатите земји членки на Европската Унија. Министерот во Софија е на покана на премиерот Бојко Борисов и министерот за здравство проф. Костадин Ангелов. По завршувањето на владината седница, во вестите на телевизија Сител, Филипче ја објасни одлуката на Бугарската влада.
На денешната седница од страна на Владата на Република Бугарија се донесе одлука од секоја колична вакцини која стугнува во Република Бугарија , една одредена количина да биде наменета за нашите граѓани и тоа да биде во форма на донација. Со ова ние практично стигнуваме до вакцините со истата временска динамика со која стугнуваат и земјите членки на Европската Унија. Бугарија како членка на ЕУ ја имаше таа привилегија да прави директни преговори со повеќе произведувачи. Благодарение на овој пријателски чин, со оваа донација за кратко ќе го почнеме процесот на вакцинација и ќе го олесниме пристапот до вакцините за да може да вакцинираме 60 до 70 % од населението – изјави министерот Филипче.
Според информациите од здравствените власти во Република Бугарија, најпрво во Софија ќе стигне вакцината на Фајзер, потоа на Модерна, па на Астра Зенека.
„Веќе разговаравме и за техничките детали во однос на испораката, верувам дека во исто време ќе добиеме дел од вакцините како и земјите од ЕУ“ – изјави Филипче.
Освен преку донација од Република Бугарија, нашата земка обезбеди вакцини и преку Ковакс механизмот. Европската Унијата за земјите членки обезбеди 400 милиони вакцини и 100 милиони дополнително за земјите кои не се во Унијата, а вакцините може да ги добиваат со посредување на земји членки. Досега таков вид на помош, на нашата земја и понудија Полска и Грција. Република Северна Македонија преговори и со произведувачите за директна набавка на вакцини и од нив.