Исплатата на пензиите ќе се одвива редовно и пензионерите својата ноемвриска пензија ќе ја добијат на 1 декември 2025 година. За оваа исплата се издвојуваат 9,297,493,427 денари, соопштуваат надлежните институции.
Одговорните уверуваат дека пензионерите нема причина за загриженост, бидејќи исплатата е целосно гарантирана и продолжува да се реализира секој први во месецот, исто како и во текот на 2026 година.
Во буџетот за наредната година се планирани речиси 151 милијарда денари за покривање на покачените пензии, здравственото осигурување на пензионерите и транзициските трошоци поврзани со вториот столб.
Во периодот од 1 октомври 2024 до 1 октомври 2025 година, пензиите се номинално зголемени за 6.000 денари. Со последното покачување, процентуалното зголемување достигнува околу 29 проценти споредено со исплатата за август 2024 година.
Како пример, за августовската пензија во 2024 година биле исплатени 7,210,341,000 денари. Со покачувањето во октомври истата година, сумата се зголемува на 8,166,689,000 денари. Во октомври 2025 година, по следното зголемување од 2.500 денари и дополнителното усогласување од 1.000 денари, исплатата достигнува 9,403,340,000 денари.
Вкупните средства за пензии во 2026 година ќе бидат повисоки за околу 30 милијарди денари, што претставува дополнителни приближно 500 милиони евра.
Сите овие корекции имаат за цел да го заштитат стандардот на пензионерите и да го ублажат ефектот од инфлацијата. Официјалните податоци покажуваат дека инфлацијата во 2024 година изнесувала 3,5%, додека за 2025 се очекува околу 3,9%.
Во споредба со овие бројки, зголемувањето на пензиите во период од само една година е значително поголемо, што според надлежните претставува најголем раст на пензиите во последните три децении.