Изјавите на некои сведоци и вработени во швајцарскиот клуб ги потврди и сопственикот на клубот, Жак Морети, за време на сослушувањето пред истражителите.
Веќе подолго време се зборуваше за тоа, но сега информацијата е и официјално потврдена – вратите за излез во случај на опасност во клубот Le Constellation во ски-центарот Кран-Монтана, каде во новогодишната ноќ загинаа 40 луѓе, биле заклучени. Тоа им го признал сопственикот на клубот на истражителите, тврдејќи дека ги отклучил кога пристигнал на местото по пожарот.
Изјавите на сведоците и вработените ги потврди и самиот сопственик на клубот, Жак Морети, за време на распитот.
Според информациите што ги пренесе РТС (швајцарската радио-телевизија), тој изјавил дека вратите за итен излез биле заклучени одвнатре во ноќта на трагедијата. Кога пристигнал на местото по пожарот, ги отклучил вратите однадвор и видел неколку тела во просторијата.
Морети, кој од петок е во притвор поради сомнеж за обид за бегство, изјавил дека не знае зошто излезот бил блокиран. Истрагата, која ја водат четворица обвинители, ќе треба да ја утврди вистината.
Швајцарските медиуми истакнуваат дека овој детал ќе биде клучен за истрагата, од едноставна причина: неколку посетители се обиделе да избегаат преку излезот за итни случаи кога избувнал пожарот, но останале заробени и на тој начин биле осудени на смрт.
Доколку обвинителите проценат дека Жак и неговата сопруга Џесика Морети, која се наоѓа во куќен притвор, се делумно одговорни за заклучените врати, би можеле да ја преквалификуваат кривичната одговорност. Во моментов, обвинетите се товарат за убиство од небрежност, подметнување пожар и нанесување тешки телесни повреди. Меѓутоа, доколку се утврди дека осомничените знаеле дека вратите се заклучени, тоа би можело да отвори хипотеза за убиство со умисла. Во тој случај, би можеле да се соочат со казна затвор до 20 години.
РТС пренесува уште една клучна информација поврзана со пената на таванот. Жак Морети наводно им рекол на истражителите дека неодамна самиот ја отстранил старата акустична пена од таванот и ја заменил со пена купена во продавницата „направи сам“ Hornbach.
Акустичната пена е лесно запалив материјал кој може да го забрза ширењето на пламенот и токсичните испарувања, правејќи го воздухот недишлив за само неколку минути.
Во пожарот загинаа 40 лица, од кои многумина биле малолетници, а повредени се 116. Освен 21 швајцарски државјанин, меѓу загинатите имало и странци, вклучувајќи седум Французи и шест Италијанци, од кои најмладиот имал 14 години. Меѓу жртвите е и Србинoт Стефан Ивановиќ. Повредените се лекуваат во неколку европски земји.
Причината за пожарот сè уште официјално не е позната, но првичните наоди укажуваат дека најверојатно бил предизвикан од искри од прскалки поставени на шишиња шампањ. Искрите ја запалиле изолационата пена на таванот, по што огнот се проширил за многу кратко време.
Јавниот обвинител на швајцарскиот кантон Вале наредил притвор за Жак Морети по испитувањето во петокот, додека неговата сопруга и ко-сопственичка на барот, Џесика, сè уште е на слобода. И двајцата изразиле жалење поради трагедијата. Таа е исто така обвинета дека за време на пожарот се обидела да избега од клубот со пари, наместо да им помогне на другите.