По навршувањето 40 години, здравјето на мажите влегува во нова фаза. Телото повеќе не може да ги игнорира годините, а ризикот од сериозни заболувања значително расте. Редовните здравствени прегледи може да откријат проблеми додека сè уште се излечиви, да спречат компликации и значително да го подобрат квалитетот на животот.
Еве кои три прегледи не смее да ги занемари ниту еден маж по 40-тата година:
1. Кардиолошки преглед
Срцето и крвните садови се најважни показатели за здравјето на мажот по 40 години. Редовниот кардиолошки преглед вклучува мерење крвен притисок, ЕКГ, ултразвук на срцето и анализа на липиди. На овој начин навреме може да се откријат висок крвен притисок, покачен холестерол и рани знаци на срцеви заболувања – состојби што може да бидат опасни по живот доколку се игнорираат.
2. Урологски преглед
Ризикот од проблеми со простатата, вклучувајќи бенигно зголемување или рак на простата, расте со годините. Редовниот урологски преглед, кој вклучува дигитален преглед на простата и PSA-тест, овозможува рано откривање на потенцијални промени и значително ги зголемува шансите за успешно лекување.
„Секој маж над 40 години треба да оди на уролог. Рутинските крвни анализи, анализа на урина и ултразвучен преглед се доволни за да откриеме евентуален проблем“, истакнал специјализантот по урологија Никола Мимовиќ, додавајќи:
„Исхраната, намалувањето или прекинот на пушењето, како и физичката активност – но без екстреми – се многу важни. Кај мажите меѓу 20 и 30 години има зголемен ризик од карцином на тестиси. Доколку навреме се оди на лекар, стапката на излечивост е 95%.“
3. Лабораториски и метаболички прегледи
Контролата на шеќерот во крвта, функцијата на црниот дроб, бубрезите и липидниот профил е клучна за рано препознавање на дијабетес, метаболички синдром и други хронични заболувања. Овие прегледи му помагаат на мажот навреме да реагира со промена на животните навики или соодветна терапија и да спречи сериозни компликации.
„Едукацијата е многу важна, особено кај помладата популација. Повремено правење лабораториски анализи, еднаш годишно, е сосема доволно. Особено контролата на мастите во крвта, бидејќи тие често може да сигнализираат посериозен проблем“, објаснил кардиологот Владaн Мудреновиќ и додал:
„Нивото на лош холестерол треба да биде под 1,4 кај мажи со кардиоваскуларни проблеми. Кај оние без проблем, нормално е од 2 до 4. Медитеранската исхрана е одлична, како и физичката активност – дури и обична прошетка е доволна.“