Православна црква и нејзините верници денес ги празнуваат светите великомаченици Тирс, Левкиј, Филимон, Аполониј и другите со нив.
Кога царот Кумврикиј, наследникот на Декиј, започнал немилосрдно да ги мачи и убива христијаните, пред него храбро застанал Левкиј и, разобличувајќи го, му рекол:
„Зошто самиот против својата душа војуваш, о Кумврикиј?“
Разјарениот судија веднаш наредил Левкиј да биде тепан и мачен, а на крајот и посечен со меч. Левкиј, измачен, одел кон погубување радосно, како кон свадба.
Гледајќи ја смртта на храбриот Левкиј, блажениот Тирс се распалил со божествена ревност и, како и Левкиј, застанал пред судијата и го изобличил за неговите злодела и неверување во единствениот вистински Бог. И тој бил тепан и фрлен во темница.
Но невидлива Божја рака го исцелила од раните, ги отворила вратите на затворот и го извела надвор. Тирс веднаш отишол кај кесарискиот епископ Филеј, кој го крстил. По крштевањето повторно бил фатен и мачен, но страдањата ги поднесувал како во сон, а не на јаве. Со силата на неговата молитва паднале многу идоли.
Гледајќи го тоа, идолскиот жрец Калиник се обратил во Христовата вера. И тој и Тирс биле осудени на смрт. Калиник бил посечен со меч, а Тирс бил ставен во дрвен сандак за да го пресечат со пила. Но Божјата сила не дозволила тоа – пилата не можела ниту дрвото да го засече.
Тогаш свети Тирс станал од сандакот, Му се помолил на Бога, благодарејќи Му за маките, и мирно му го предал духот на својот Господ. Кон крајот на IV век, кесарот Флавиј подигнал црква во негова чест кај Цариград и таму ги положил неговите свети мошти. Светителот ѝ се јавил во видение на царицата Пулхерија и ѝ препорачал да ги погребе моштите на четириесетте маченици покрај неговите.
Светите маченици Филимон, Аполониј, Аријан и другите
Во времето на Диоклецијан, некој судија по име Аријан жестоко ги мачел христијаните во Египет. Ги фатил и Аполониј и му се заканил со маки. Исплашен, Аполониј потплатил еден познат музичар – незнабожецот Филимон – да се облече во неговата облека и наместо него да принесе жртва на идолите.
Но кога Филимон застанал пред идолите, одеднаш во неговото срце засветлила светлината на христијанската вера. Се прекрстил и гласно извикал:
„Христијанин сум! Слуга на Христа, живиот Бог!“
Судијата се насмеал, мислејќи дека Филимон им се потсмева на христијаните. Потоа Филимон бил подложен на страшни маки, а дожд од небото паднал врз него и го крстил.
На крајот и Филимон и Аполониј биле посечени по наредба на судијата Аријан. Но тогаш и самиот Аријан станал христијанин, откако чудесно му било исцелено слепото око на гробот на Филимон. Подоцна бил осуден на смрт од царот Диоклецијан и погубен заедно со четворица војници, кои исто така се изјасниле како христијани.
Молитва за денешниот ден
Ја познавте верата, Го исповедавте Христа,
Телото го предадовте, за душата да ја спасите.
Затоа вашето име на небесата блеска
И во Црквата свети како оган неугаслив.
Молете се за нас, бесмртни јунаци,
Да се растурат од нас гревовните облаци:
Левкиј блажени и Тирсе јуначки,
Калиниче славен, Филимоне достоинствен,
И сите други што тешки болки поднесовте,
А сега сте жители на подобар свет.
Молете се за нас, светли светилници,
Молете се за Црквата, Божји маченици.
Ја познавте љубовта – небесна сопственост,
Земјата не го знае ни вистинското ѝ име.
Ја видовте целосно во Божјиот Син,
Во знакот на страдањето и крвавото чело.
Сега сте близу до Бога и Неговото лице го гледате,
Со вашите молитви покријте ги нашите гревови.