Готвените јадења често можат да бидат калорични поради класичната запршка со брашно. Со неа во јадењето се додаваат дополнителни калории, најчесто од масти. Освен тоа, јадењата со ваква запршка обично се потешки за варење.
Негативната страна на запршката со брашно е што при пржење на масло на висока температура, молекулите на скроб се обвиткуваат со маст. Поради тоа, дигестивниот систем мора повеќе да работи за да ги разгради. Кај некои луѓе ваквата запршка може да предизвика надуеност, тегоби во желудникот, па дури и пролив.
Здрава запршка од зеленчук и житарици
Наместо класична запршка, може да се земе дел од зеленчукот или мешунките од јадењето што се готви, да се испасираат и повторно да се вратат во тенџерето. Овој метод е особено погоден за разни чорби и манџи, како што е и гравот.
Густина може да даде и добро сварен зеленчук богат со скроб, како компир или морков. Тие може да се изрендаат и да се додадат во јадењето додека се вари. Ова се смета за една од најздравите „запршки“ за варени јадења.
Одлични згуснувачи за манџи се и житариците како ориз, јачмен и просо, кои при варење испуштаат природна слуз. Исто така, како згуснувач можат да послужат и овесни снегулки или трици, кои при варење се распаѓаат во јадењето. Освен што ќе ја дадат потребната густина, тие ќе го збогатат јадењето и со корисни растителни влакна.
Зошто грашокот е толку здрав
Можеби како дете не сте го сакале грашокот, но ова мало зелено зрно е исклучително хранливо. Грашокот е богат со витамини, минерали, протеини и растителни влакна.
Всушност, една шолја грашок содржи околу 8,5 грама протеини, што е повеќе од двојно од количината што ја има во една лажица путер од кикирики. Воедно, една шолја варен грашок содржи и околу 9 грама влакна, што помага подолго да се чувствувате сити.
Моќен антиоксиданс
Покрај високата хранлива вредност, грашокот е богат со растителни протеини, кои се важни за мускулната сила и здравјето на коските. Тие помагаат и во одржување на здрава телесна тежина бидејќи го намалуваат апетитот.
Грашокот содржи и фенолни соединенија – природни антиоксиданси кои го штитат организмот од разни заболувања, вклучувајќи и воспалителни процеси.
Добар за срцето и крвните садови
Постојат повеќе причини зошто грашокот е добар за здравјето на срцето. Една од нив е високата содржина на влакна, кои помагаат во подобрување на мастите во крвта, намалување на крвниот притисок и воспаленијата.
Минералите што ги содржи – калиум, магнезиум и калциум – исто така придонесуваат за одржување на нормален крвен притисок. Освен тоа, грашокот е богат со витамин Ц, каротеноиди и флавоноли кои дополнително го поддржуваат здравјето на срцето.
Одличен за варењето
Големата количина растителни влакна во грашокот е многу важна за здрав дигестивен систем. Влакната помагаат во развој на корисните бактерии во цревата, со што се намалува размножувањето на штетните бактерии.
Помага во регулирање на шеќерот во крвта
Поради високото ниво на протеини и влакна, грашокот може да помогне во регулирање на нивото на шеќер во крвта. Храната богата со влакна ја забавува апсорпцијата на јаглехидратите, што значи дека шеќерот во крвта расте побавно и постабилно.
Протеините исто така играат важна улога во стабилизирање на шеќерот во крвта, особено кај луѓе со дијабетес тип 2.
Грашокот содржи и витамини A, D, C и K, како и магнезиум, кои придонесуваат за одржување на здраво ниво на шеќер во крвта. Покрај тоа, има и низок гликемиски индекс, што го прави добра намирница за здрава исхрана.