Русија во моментов е единствената држава на чии граѓани им е дозволено да го посетат ексклузивното летувалиште Wonsan Kalma. Руската блогерка Дарија посакала да отпатува таму и да им покаже на луѓето како изгледа летување во Северна Кореја.
Иако земјата е во голема мера затворена и таинствена за остатокот од светот, сепак успева да привлече дел од туристите. Крајбрежниот туристички комплекс е отворен во јуни и се наоѓа на источниот брег, во близина на аеродром во регионот Кангвон.
Според најавите, комплексот е граден по модел на големи медитерански летувалишта и има капацитет до околу 20.000 посетители, со десетици хотели, пансиони и рекреативни објекти.
Државните медиуми го опишуваат како „град од национално значење“. Од отворањето, пристапот им е ограничен на сите странци освен на руските туристи. Според објавени податоци, во 2025 година земјата ја посетиле речиси 10.000 руски државјани — највисока бројка во последните години.
Искуството на руската блогерка
По неколку дена престој во Пјонгјанг, Дарија заминала во одморалиштето кое се протега долж неколку километри песочна плажа. Таа изјавила дека не чувствувала страв од контроли и надзор, додавајќи дека посетителите најчесто се придружувани од лица задолжени за нивниот престој.
Според неа, придружбата била постојана, но се однесувале љубезно и комуницирале со туристите, со објаснување дека е тоа грижа за да не се изгубат или да не прекршат некое правило. Сепак, имало и моменти кога можела да прошета сама, дури и доцна навечер покрај морето.
Храна и инфраструктура
За време на престојот, туристите биле носени во различни ресторани каде се служеле специјалитети од патка, зајак и разни видови риба. Објектите и хотелите во комплексот оставиле силен впечаток — уредени ентериери, украсни елементи и големи јавни простори.
Други посетители од Русија исто така изјавиле дека престојот им бил пријатен и мирен, со многу мал број гости и без чувство на небезбедност.
Ограничувања и правила
Официјалните туристички канали објавиле дека за останатите странски посетители пристапот до ова крајбрежје е привремено затворен. По ублажувањето на мерките по пандемијата, Русија останува единствената земја со дозволен туристички влез во овој регион.
Патниците кои претходно ја посетувале земјата сведочат дека правилата се строги и мора доследно да се почитуваат. Не е дозволено отстранување пропаганден материјал или непочитување на државните симболи. Властите, предводени од Ким Џонг Ун, имаат прецизни протоколи за однесување на туристите.
Општ впечаток од искуствата е дека престојот може да помине мирно доколку посетителите ги следат упатствата и локалните правила.