Граѓанската иницијатива Зелен хуман град бара итно активирање на системот „Безбеден град“ со цел да се откријат и санкционираат лицата што, според нивните наводи, со месеци исфрлаат кучиња од други градови на територијата на главниот град. Оттаму предупредуваат дека ваквата појава предизвикува раст на инциденти и страв кај населението.
Од иницијативата велат дека во последниот период сè почесто се појавуваат пријави и снимки на напуштање животни, како и несакани средби меѓу луѓе и бездомни кучиња. Според нив, постои ризик проблемот намерно да се зголемува за подоцна да се наметнат радикални мерки како единствено решение.
Активистите посочуваат дека на седница на комисија за комунални работи во рамки на Град Скопје била отворена дискусија во која бил споменат и терминот „еутаназија“, што дополнително ја зголемило загриженоста кај здруженијата за заштита на животните.
Во своето соопштение тие повикуваат на:
-
итно користење на системот „Безбеден град“ за идентификација на сторителите
-
ригорозни и неселективни казни за сите што напуштаат животни
-
поголема институционална контрола и превенција
-
граѓаните да пријавуваат и документираат случаи на исфрлање кучиња, но од безбедна дистанца
Иницијативата реагира и за состојбите во јавното претпријатие Лајка, наведувајќи дека биле направени кадровски промени во управните структури и дека е потребен посилен фокус на долгорочни, хумани стратегии за контрола на популацијата на бездомни животни.
Според нив, решението не е во краткорочни мерки, туку во одговорно сопствеништво, повисоки казни и законски измени со кои напуштањето миленик би се третирало како потешок прекршок.