Pizza Hut планира да затвори 250 свои ресторани во САД во текот на првата половина од годинава, а одлуката доаѓа во период кога матичната компанија разгледува можност за продажба на целиот бренд. Од Yum Brands соопштија дека затворањата ќе се однесуваат на локации кои работат под очекуваните резултати. Во моментов, Pizza Hut има повеќе од 6.000 ресторани низ САД, според американските медиуми.
Компанијата Yum Brands, со седиште во Луисвил, Кентаки, уште во ноември најави дека спроведува официјална анализа на стратешките опции за Pizza Hut. Ланецот веќе подолго време се соочува со проблеми поради застарени ресторани и сè посилна конкуренција на пазарот. Како показател за падот, продажбата во американските ресторани кои работат најмалку една година е намалена за 5% во текот на минатата година.
За разлика од Pizza Hut, нивниот главен конкурент Domino’s бележи подобри резултати. Иако сè уште немаат објавено целосни годишни финансиски извештаи, продажбата во нивните ресторани во САД во првите девет месеци од минатата година пораснала за 2,7%.
На меѓународно ниво, резултатите на Pizza Hut се постабилни. Продажбата на странските пазари е зголемена за 1%, со особено добри резултати во Азија, на Блискиот Исток и во Латинска Америка. Кина е втор најголем пазар за Pizza Hut надвор од САД и учествува со околу 19% од вкупната продажба.
Извршниот директор на Yum, Крис Тарнер, изјави дека анализата за иднината на Pizza Hut треба да заврши до крајот на годината, но без да открие дополнителни детали. На глобално ниво, синџирот ја завршил 2025 година со 19.974 ресторани, што е намалување од 251 локација во однос на претходната година.
И покрај намалувањето на вкупниот број, во текот на минатата година биле отворени речиси 1.200 нови ресторани во 65 земји, но тоа не било доволно да го надомести бројот на затворени објекти. Од компанијата најавуваат нови отворања и во текот на 2026 година, но без конкретни детали.
Историјата на Pizza Hut започнува во 1958 година во Вичита, Канзас. Ланецот бил преземен од PepsiCo во 1977 година, а во 1997 ресторанот бизнис бил издвоен во посебна компанија – денешниот Yum Brands, кој во своето портфолио ги има и KFC, Taco Bell и Habit Burger & Grill.