Утре, на 29 ноември, православните верници го празнуваат денот на светиот апостол Матеј.
Свети Матеј, синот на Алфеј, прво бил цариник – човек кој работел со бројки, даноци и сметки. Но, неговиот живот се променил засекогаш кога во Капернаум Го видел Господ. На Христовиот повик: „Врви по Мене“, Матеј без двоумење го оставил сè и тргнал по Него.
Како еден од дванаесетте апостоли, тој бил сведок на Христовото учење, Неговите чудеса, смртта и воскресението. Во својот дом го пречекал Христос, а таму се изговориле првите зборови кои го отворале патот кон духовната вистина. Подоцна, преку силата на Светиот Дух, Матеј го проповедал Евангелието во Партија, Мидија и Етиопија, исцелувал болни, крстел многумина и ширел љубов и милосрдие. И пред мачеништвото останал верен, носејќи светлина и духовна храброст.
Матеј се почитува како заштитник на цариниците, даночните службеници, сметководителите и банкарите, но и како чувар на сите кои се стремат кон чесност, праведност и чистота на душата. Во народната традиција, неговиот ден симболизира изобилство, мир и благослов во домот. Верувањето вели дека овој ден е вистински момент да се завршат долгови, да се расчистат стари обврски и да се отвори пат за нови благодати.
Духовни обичаи и верувања за денот на Свети Матеј
Верниците го започнуваат денот со молитва и со читање на делови од Евангелието по Матеј. Постот со овошје и зеленчук ја претставува воздржаноста и посветеноста.
Според народните верувања, сè што ќе се започне на овој ден со чисто срце – ќе биде благословено. Затоа се препорачува да се решат недоразбирања, да се вратат долгови и да се направат добри дела.
Вечерта пред празникот некои оставаат чаша вода на прозорецот за да видат „знак“ во сонот – нешто поврзано со своето здравје или благосостојба. Други ставаат малку жито или сол на трпезата како симбол на заштита и изобилство. Се смета дека спокоен и убав сон во оваа ноќ е знак дека Свети Матеј ќе го води човекот со Божја милост во периодот што следува.
Свети Матеј има особено значајно место во христијанството, бидејќи преку него ни е оставена молитвата „Оче наш“ – вистинскиот пример за чиста и искрена молитва. Тој во своето Евангелие учи и како не треба да се молиме: без лицемерие, без празни зборови и без желба за човечка пофалба. „Моли се во тишина пред Отецот, Кој гледа сè што е тајно, и ќе те награди јавно“, пишува Матеј.