Брзиот пораст на шеќерот во крвта е еден од главните механизми на организмот за складирање масти, а може да доведе и до долгорочни последици. За да се успори овој скок на глукозата, важно е да се внимава и на исхраната и на начинот на живот.
Нивото на шеќер во крвта варира во текот на денот. Два часа по јадење, кај здрави лица тоа треба да биде под 7.8 mmol/L.
Иако загриженоста за нагли скокови на глукозата најчесто се поврзува со дијабетес, тие се важни и за нивото на енергија, апетитот, расположението, концентрацијата и метаболизмот.
Зошто шеќерот во крвта скока по оброк?
Нивото на глукоза во крвта нагло се зголемува по јадење, бидејќи телото ја разградува храната – особено јаглехидратите – во глукоза, која потоа влегува во крвотокот. Тоа е природен процес, бидејќи глукозата е главното гориво за клетките.
Кога нивото на шеќер се зголемува, панкреасот лачи инсулин – хормон кој им помага на клетките да ја искористат глукозата за енергија или да ја складираат како гликоген и масти.
Колку брзо и колку високо ќе скокне шеќерот зависи од повеќе фактори: видот на храната (поврќето делува побавно, слатките нагло го креваат шеќерот), комбинацијата на намирници (протеини и масти го успоруваат порастот), како и од метаболизмот и чувствителноста на инсулин на поединецот.
Пет совети за да спречите нагли скокови на шеќерот по јадење
1. Комбинирајте јаглехидрати со протеини и масти.
Наместо леб или тестенини сами по себе, додајте пилешко, риба, сирење или авокадо. Така варењето ќе биде побавно, а глукозата ќе се ослободува постепено.
2. Јадете сложени јаглехидрати.
За разлика од слатки, сокови и бело брашно, интегралните житарки, зеленчукот и мешунките го покачуваат шеќерот постепено, што е клучно за балансирана исхрана.
3. Прошетајте по јадење.
Кратка прошетка од 10–15 минути значително го намалува порастот на шеќерот, бидејќи мускулите ја користат глукозата од крвта.
4. Внимавајте на редоследот на храната.
Ако прво изедете зеленчук и протеини, а потоа јаглехидрати, порастот на шеќерот ќе биде многу помал.
5. Внимавајте на гликемискиот индекс (ГИ).
Гликемискиот индекс покажува колку брзо храната го крева шеќерот во крвта. Намирници со висок ГИ (обично богати со преработени јаглехидрати и шеќери) брзо се варат и предизвикуваат нагли скокови. Храна со низок ГИ (богата со влакна и протеини) се разградува побавно, па и порастот на шеќерот е поспор.