Дали во последно време ви се случува почесто од вообичаено сè околу вас да „пецка“, да ве удри струја кога ќе се поздравите со некого или кога ќе се пресоблекувате? Ако е така – не сте единствени.
И дома, и на работа, а особено на социјалните мрежи, сè повеќе луѓе се жалат дека се наелектризирани со денови, па дури и со недели – косата им се крева, а при секој допир со предмети „сева“.
Јасно е дека станува збор за статички електрицитет, кој иако не е опасен, знае сериозно да го расипе денот – облеката се лепи за телото, постојано „пука“, а секој допир е непријатен. Но зошто овој проблем е поизразен токму сега?
Причината е – годишното време
Како што пишува порталот spectrumlocalnews.com, со опаѓањето на температурите, во воздухот има сè помалку влага, па тој станува посув. Влагата, односно водената пареа во воздухот, е добар проводник и вообичаено го „собира“ вишокот електрично наелектризирање.
Но во зима, кога воздухот е сув и сиромашен со влага, тој вишок се таложи на нас – на облеката, косата и кожата.
Како да се ослободите од статичкиот електрицитет?
За среќа, постојат неколку едноставни и практични трикови:
🔹 Алуминиумска фолија за коса
Американската фризерка Шерон Дорам покажа дека алуминиумската фолија е многу ефикасна против наелектризирана коса.
Завиткајте мало парче фолија околу прамен и повлечете од коренот надолу. Фолијата е проводник и веднаш го „собира“ статичкиот електрицитет, ја измазнува косата и ѝ враќа сјај.
🔹 Топчиња од фолија во сушара
Направете топче од алуминиумска фолија и ставете го во машината за сушење алишта. Тоа помага во неутрализирање на статичкиот електрицитет за време на сушењето.
🔹 Омекнувач за алишта
Освен што ја прави ткаенината помека, омекнувачот го намалува и триењето меѓу влакната – а со тоа и статичкиот електрицитет.
🔹 Влажна крпа во сушара
Ако користите сушара, ставете една лесно навлажнета крпа со алиштата. Влагата ќе помогне да се „повлече“ вишокот електрично полнење.
🔹 Природни материјали
Облека од памук, волна или лен е многу помалку склона кон создавање статички електрицитет отколку синтетичките материјали.
🔹 Зголемете ја влажноста на воздухот
Користете навлажнувач на воздух или едноставно ставете сад со вода во просторијата. Поголемата влажност значително го намалува овој проблем.
🔹 Антистатички марамчиња
Во продажба има специјални антистатички марамчиња за сушара кои го спречуваат таложењето на електрицитет на ткаенините.
🔹 Оцет во машината за перење
Додајте малку бел оцет при последното плакнење. Тој делува како природен омекнувач и помага во неутрализација на електричното полнење.
🔹 Допир со метал
Пред да се облечете, допрете метален предмет (на пример радијатор). Ова може да помогне во „празнење“ на статичкиот електрицитет.
🔹 Памучна маица под синтетичка облека
Памукот апсорбира влага и може да го намали наелектризирањето што го создава синтетичката облека.
🔹 Лак за коса
Малку лак за коса на внатрешната страна од облеката може привремено да го неутрализира статичкиот електрицитет.
🔹 Природно сушење
Кога е можно, сушете ја облеката на воздух. Во сушарата, поради триењето, статичкиот електрицитет полесно се создава.
Со комбинација од овие едноставни совети, можете значително да го намалите или целосно да го елиминирате непријатниот статички електрицитет – и зимата да ја поминете без „пецкање“.