Ако сакате пикантна зимница и лук, сигурни сме дека откако ќе ги пробате овие пиперки во маринада, ќе ги подготвувате секоја година.
Подготвувањето зимница е карактеристично за овој период од годината. Домаќинките веќе со недели подготвуваат зимница, ги пастеризираат теглите и ги складираат производите во кои заедно со своите најблиски ќе уживаат во постудениот период од годината.
Ѕвезда на зимницата секако се пиперките. Тие се главна состојка на ајварот и пинџурот, а од нив можете да подготвите и пеглани пиперки, пиперки во павлака, но и маринирани пиперки кои се совршени за сите што сакаат лук.
Пиперките во маринада според македонски рецепт се подготвуваат многу лесно и претставуваат совршена салата со секој оброк, а можат да бидат одличен избор и за претстојната сезона на слави.
Состојки:
- 50 црвени месести пиперки
- 250 мл масло
- 250 мл оцет
- една рака шеќер
- една рака сол
- 2–3 главици лук
- 2 китки магдонос
- 1 кесичка црн бибер во зрно
Подготовка:
Испечете ги пиперките, а потоа излупете ги. Отстранете ги само дршките и оставете ги пиперките цели.
Во поголемо тенџере ставете ги маслото, оцетот, солта и шеќерот и оставете ја смесата да зоврие.
Потоа ставете ги пиперките во тенџерето за малку да се продинстаат во маринадата.
Маринирајте ги пиперките околу 10 минути на тивок оган, без мешање со лажица. Наместо тоа, повремено протресувајте го тенџерето.
Ситно исечкајте го лукот и измешајте го со сечканиот магдонос и биберот.
Кога пиперките малку ќе се изладат, наредете ги во теглите: еден ред пиперки, потоа малку од мешавината од лук и магдонос, па повторно пиперки. Продолжете така сè додека теглите не се наполнат.
Прелијте ги пиперките со маринадата и оставете ги теглите отворени преку ноќ.
Следното утро дополнете ги теглите со уште малку маринада, добро затворете ги и складирајте ги на соодветно место.