Зошто некои жени чувствуваат срам поради развод? Еве 11 мудри совети што една жена би сакала некој да ѝ ги кажел – затоа повторувајте по нас: „Нема срам во разводот.“
Стигмата поврзана со зборот што почнува на буквата „р“ – развод – кај некои жени може да предизвика чувство на срам. Затоа што „пропаднала во бракот“, „не успеала да биде добра сопруга“, или затоа што „се чувствува виновна што ги изневерила децата и го прекршила заветот ‘додека смртта не нè раздели’“.
Затоа секоја жена треба да ги прочита овие 11 мудри совети и да почне живот одново.
„Кога тие завети биле пишувани во средината на 16 век во Англија, луѓето се венчавале во тинејџерските години и живееле уште една или две децении, ако имале среќа. Денес луѓето живеат 80, дури 90 години. Тоа е огромна разлика за да можеме да бидеме среќни во бракот ‘во добро или зло, додека смртта не нè раздели’“, пишува за YourTango Рене Кет, лајфкоуч и инструкторка за врски од Австралија, специјализирана за прекини и разводи.
„Не е ни чудо што толку многу луѓе се разведуваат. Живееме многу подолго и имаме цел свет на дофат на раката – да го видиме, да сонуваме и да го истражиме“, додава таа и ги наведува 11-те мудри работи што би сакала некој да ѝ ги кажел кога се давела во срамот поради развод:
1. Не е лесно „само да преминете преку тоа“
Разводот е еден од најстресните животни настани, веднаш по смрт на блиска личност. Поминувате низ сличен циклус на тагување, а сепак личноста за која тагувате е сè уште жива.
Без разлика на причината, крајот на бракот што почнал со соништата за среќен живот е срцепарателен. Во ред е да се доживее тага по разводот – тоа е длабоко чувство бидејќи крајот на бракот значи дека целиот живот мора да се промени.
2. Деловната страна на разводот е застрашувачка
Најголемата непозната е: што следува? Кому да верувате, кому прво да се обратите; кои се вашите законски права, колку ќе ве чини сето тоа…
Првата средба со адвокат или медијатор е застрашувачка. Никој не е подготвен на разговори за финансии и родителство, но мора да се соочите со тоа. Треба да знаете што сакате, да бидете доволно силни да го побарате и да останете фокусирани на најважното – промена што ќе работи за вас.
3. Ќе научите многу за себе
Ова е најголемата школа во животот. Ќе дознаете повеќе за другите, за семејството, за пријателите – но најмногу за себе.
Ќе се преиспитувате: што значи брак, каде згрешив (а можеби и не), како ми се случи ова… Ќе видите добро, лошо и токсично во некои луѓе. Некои лекции мора да се научат.
4. Ќе им покажете на децата што е реалноста на љубовта
И по официјалниот крај на бракот, вие и понатаму сте поврзани преку децата. Ќе мора да се гледате и да разговарате.
Треба да внимавате на зборовите затоа што им давате пример на децата. Тие гледаат дека е во ред да бидете повредени, да бидете лути, да бидете сами или празни.
5. Скршени сте – но ќе се составите
Чувството е како целиот свет да ви се свртел наопаку. Но потоа ќе се исправите, ќе застанете на нозе и ќе продолжите да живеете. Разводот може да ви го подобри животот.
6. Можете повторно да изградите живот
Многу жени морале да се вратат на работа со полно работно време за да ја издржуваат семејството. Некои учеле нови вештини по години без работа.
Разводот не е само финансиска обнова – тој е и пресвртница за самодовербата.
7. Можете да го редефинирате својот идентитет
Кој сте вие? Вие сте доволни и неверојатни. Вашиот идентитет доживеал потрес – време е да се редефинирате и да поставите нови стандарди.
8. Делењето на грижата за децата значи повеќе слободно време
Може да биде тешко да се соочите со тоа дека децата не се секогаш со вас. Но тоа е време што треба да го искористите за себе – да најдете задоволство и да станете посреќни.
9. Научете ја зборот на буквата „п“ – попуштање
Можеби ќе мора да попуштите за куќата, автомобилот или нешто друго. Ретко кога постои „праведна“ поделба, постои само она што законот го смета за правично. Со попуштање се завршува војната.
10. Учете се на простување
Кога ќе простите, правите место за мир во умот, телото и срцето. Го ослободувате гневот и избирате да бидете подобрата личност.
11. Можете да почнете одново
Животот почнува повторно. Ќе бидете подготвени да пробате нови нешта, да запознаете нови луѓе, да ја исполните вашата „листа на желби“.
Разведената жена нема апсолутно никаква причина за срам. Разводот ќе ве потресе, ќе ве сруши, а потоа ќе ве исправи – само за да видите од што сте направени.
Разведената жена е некој на кого може да се смета. Таа знае кој е и за што се залага. Го познава стравот и љубовта, тагата и радоста.
Потребна е храброст да се прекине врска. Потребно е да се сакате себеси повеќе отколку сопругот, затоа што заслужувате подобро – заслужувате да бидете среќни.