„Експлозијата е она што го паметам“, вели српскиот претприемач во интервју за The Guardian.
Експлозијата е последното нешто што Љубиша Каровиќ го памети пред за малку да биде извлечен од авионот. Оглушувачкиот звук од пукањето на прозорецот го разбудил од сон додека седел на местото 11F, до прозорецот, на утринскиот лет на Ryanair од Грција кон Германија.
Единаесет дена и единаесет ноќи подоцна, Љубиша сè уште не може да го заборави моментот на експлозијата, поради кој навечер не може мирно да спие.
„Експлозијата е она што го паметам. Тоа е звукот пред хаосот. Звукот што секогаш го слушам кога ќе ги затворам очите за да заспијам“, вели тој.
Болките и понатаму го мачат Љубиша Каровиќ, што е сосема разбирливо. Изгорениците и модринките што ја покриваат неговата десна рака, сè до пазувите и градите, сведочат за настан што ретко кој би можел да го преживее. Шеесет и едногодишниот маж за време на летот бил извлечен низ прозорецот на авионот, кој се одвоил во текот на летот под околности што сè уште се истражуваат – и останал жив.
„Имав среќа“, вели скромно додека седи на терасата од вилата што ја изнајмил во Катерини, туристичко место недалеку од Солун.
„Не паметам многу, а главата и вратот сè уште ме болат, но жив сум. Можеби ме спаси сигурносниот појас, бидејќи бев врзан. А можеби тоа беше судбина. Верувам во Бог и секој ден му благодарам.“
Поминаа само неколку дена откако бил пуштен од болница. Вели дека шокот бил огромен, но самата можност денес да ја раскаже својата приказна е вистинско чудо. Неговиот грчки адвокат Василис Цијарас го опишува како човек што „останал жив по чиста случајност“.
„Љубиша повеќепати беше на работ на смртта. Кога кабината го изгуби притисокот, тој беше извлечен низ прозорецот до половина од телото и веднаш ја изгуби свеста. Патуваше во Германија за да го прослави роденденот на својот брат, а наместо тоа, на височина од околу 4.600 метри се најде со главата и десната рака надвор од авионот што летал со повеќе од 600 километри на час. Замислете го тоа. Ја погледна смртта в очи, ѕирна во другиот свет и се врати“, вели адвокатот.
Патниците на летот FR1879, меѓу кои била и неговата сопруга Светлана, која седела три реда зад него, сè уште јасно се сеќаваат на моментот кога прозорецот пукнал, кога паднале кислородните маски и настанал хаос. Шишиња и други предмети летале низ кабината, додека патниците се обидувале да го задржат Љубиша за целосно да не биде извлечен од авионот.
„И јас веднаш притрчав. Никој од кабинскиот персонал не помогна. Помогнаа патниците“, раскажува Светлана.
„Еден човек, мислам дека беше Албанец, беше неверојатен. Направи сè што можеше за да го вовлече назад во авионот, а потоа се обиде да го затвори отворот – прво со торба, која веднаш беше извлечена надвор, а потоа со куфер, што успеа. Засекогаш ќе му бидеме благодарни.“
Таа додава дека ужасните моменти, во кои го гледала својот сопруг „половина во авионот, половина надвор“, траеле околу една и пол до две минути.
„Ми кажаа дека сум се онесвестил двапати, а потоа повторно и во авионот, и дека лицето накратко ми било отечено и деформирано поради притисокот и силниот налет на воздух“, вели тивко Каровиќ.
Ryanair го брани постапувањето на својот персонал, наведувајќи дека кабинскиот екипаж „завршил феноменална работа“. Адвокатот Цијарас не се согласува со тоа.
Тој вели дека компанијата го контактирала синот на Љубиша, Даниел, кој го резервирал летот, но дека ниту Љубиша ниту Светлана не добиле телефонски повик, ниту каква било помош или поддршка.
„Немаме никаква забелешка за пилотот, кој ги следеше сите безбедносни процедури и одлично управуваше со ситуацијата“, додава адвокатот, мислејќи на итното спуштање што пилотите мора да го изведат кога авионот ќе изгуби притисок во кабината.
„Мојот клиент се онесвести два или три пати – еднаш додека беше делумно извлечен низ прозорецот, а уште двапати во авионот. Во ниту еден момент кабинскиот персонал не му понуди помош“, тврди адвокатот.
Ryanair ги оспорува овие тврдења, наведувајќи дека за време на декомпресијата и итното спуштање сите патници и членови на екипажот мора да бидат врзани и да ги стават кислородните маски.
„Штом авионот достигна безбедна висина, кабинскиот персонал му пружи помош на господинот Каровиќ, го премести на други седишта покрај неговата сопруга и организираше лекар кој се наоѓал во авионот да остане со нив до безбедното слетување во Солун. Исто така, обезбедија медицинска екипа да ги пречека по слетувањето“, соопшти авиокомпанијата.
Повикувајќи се на изјавите на сведоци, Цијарас тврди дека кабинскиот персонал бил парализиран од страв, убеден дека авионот ќе се урне поради наглото губење висина.
„Сите се согласуваат дека екипажот беше во шок и се плашеше дека авионот ќе падне. Другите патници се организираа и му дадоа вода на Љубиша“, вели тој.
Каровиќ, сопственик на фабрика за алуминиум во Србија која со години извезува производи низ целиот свет и човек кој често патувал со авион, денес вели дека само помислата повторно да лета му предизвикува морници.
Лекарите го предупредиле дека закрепнувањето ќе биде долго. Му наложиле најмалку шест недели да носи ортопедска крагна, по што ќе одлучат дали ќе биде потребна операција.
„Постојано ми се враќаат сликите – звукот на експлозијата, хаосот – но сакам да оздравам“, вели тој.
„И да, треба да има и обештетување. Не само електронски пораки за повторно резервирање на летот.“
На крајот, на прашањето дали има порака до другите патници, тој се насмевнал и рекол:
„Секогаш проверувајте дали сигурносниот појас ви е правилно врзан. Не сакам никој да го доживее она што мене ми се случи.“