Во изминативе две години, Скопје сè почесто се наоѓа во фокусот на јавноста поради новите градби што никнуваат низ различни општини, а кои редовно стануваат тема на жестоки дискусии на социјалните мрежи.
Особено иронични коментари предизвикуваат т.н. „центарска“, „чаирска“ и „битпазарска“ архитектура – поими што корисниците ги користат за да опишат објекти со спорна естетика и функционалност.
Така, и вчера на социјалната мрежа „Х“ (поранешен Твитер) се појави фотографија од новоизградена зграда во центарот на Скопје, која за кратко време привлече големо внимание.
Судејќи според фотографијата објавена од еден корисник, може да се забележи дека еден од носечките столбови не е поставен под прав агол, што веднаш предизвика лавина од реакции, шеги и загрижени коментари.
„Ова ли е новиот архитектонски стил?“, „Гравитацијата во Центар важи по други правила“, беа само дел од реакциите под објавата.
Инаку, ова не е изолиран случај. Само пред две недели, на социјалните мрежи кружеше видео на кое се гледа како врз поткровје на постоечка зграда во близина на Бит Пазар се доградуваат уште неколку ката, што повторно ја отвори дебатата за урбанизмот, безбедноста и контролата на градбите во главниот град.
Дали станува збор за оптичка илузија, техничка грешка или навистина сериозен пропуст – засега останува нејасно, но едно е сигурно: скопската архитектура сè почесто станува предмет на јавна загриженост и потсмев.