Болеста пристигна и помеѓу народните избраници во Собранието, па тоа е причината поради која премиерот Зоран Заев денеска изјави дека очекува тоа да почне да работи онлајн.
Имено потврдени се двајца пратеници како позитивни на тестирањето, затоа премиерот информираше дека следната владина седница ќе биде онлајн, а верува дека власта и опозицијата ќе се договорат на таков начин да работат и пратениците, по препорака на здравствените власти.
– Верувам дека Парламентот веднаш ќе помине на онлајн опција доколку пратениците така се договорат, согласно Деловникот. Владата наредната седница во вторник ќе ја има онлајн. Ние немаме сè уште лице со симптоми или заразено, но по препорака на министерот Венко Филипче и Комисијата за здравствена заштита ни беше укажано дека согласно бројките треба да се подготвиме за онлајн владини седници. Верувам дека и Парламентот ќе биде многу разумен и ќе ја воспостави онлајн работата затоа што тоа го направија, колку што гледам, речиси сите парламенти и во регионот и во Европа, рече Заев.
Тој потенцира дека многу е важно институциите да функционираат, да бидат будни за да го следат овој период кој нема да биде лесен како летниот оти гледаме дека бројките се големи.
Заев исто така истакна дека министерот Филипче го информирал дека комплетно успешно е направена целосна организација со подготовки на резервни доктори, медицински сестри, и дека пополека е влезена во употреба и монтажната болница, бидејќи Инфективната клиника речиси е пополнета
– Ќе ги дигаме сите капацитети, секако, затоа што гледаме дека бројките растат во светот, растат и кај нас. Но останува помошта која ја бараме од граѓаните, а тоа е да ги почитуваме мерките, да носиме маска, редовна дезинфекција, држење дистанца, да нема движење надвор доколку за тоа нема итна потреба, групирање или слично. Сето тоа ќе им помогне на нашите херои, а тоа се лекарите и медицинските сестри, целиот болнички персонал коишто работат на оваа проблематика,секако сè додека не се најде конечното решение, а тоа е вакцината и лекот, рече Заев.