Астрономската зима започнува на зимската краткоденица, на 21 декември 2026 година во 21:50 часот по средноевропско време, и ќе трае до 20 март 2027 година.

Деновите стануваат сè пократки, темнината паѓа сè порано, а снегот веќе ги покри дел од планините. Поради тоа, многумина се прашуваат кога официјално започнува зимата оваа година – и метеоролошката и астрономската.

Астрономската зима започнува на зимската краткоденица, на 21 декември 2026 година во 21:50 часот по средноевропско време, а ќе трае до 20 март 2027 година.

Сепак, метеоролошката зима не започнува на истиот датум. Иако снегот веќе падна на одредени планини кон крајот и почетокот на ноември, а температурите се намалија, за официјалниот почеток на зимската сезона ќе треба да почекаме до 1 декември.

Кога е најкраткиот ден во годината?

Почетокот на астрономската зима носи и една интересна појава – најкраткиот ден и најдолгата ноќ во годината.

Во Скопје, на 21 декември, Сонцето ќе изгрее околу 7:12 часот, а ќе зајде околу 16 часот.

Тоа значи дека ќе имаме најмалку дневна светлина и најдолга ноќ во годината. Денот ќе трае приближно осум часа и 47 минути, додека ноќта ќе биде подолга од 15 часа.

Токму тогаш северната Земјина полутопка добива најмалку дневна светлина поради наклонот на Земјината оска во однос на Сонцето.

Добра вест за оние кои не ги сакаат кратките зимски денови е тоа што по 21 декември денот постепено ќе почне да се продолжува, а ноќите ќе стануваат сè пократки, сè до 20 март 2027 година.

Метеоролошката зима започнува на 1 декември

Метеоролошката зима започнува порано, на 1 декември, и ги опфаќа декември, јануари и февруари.

Според оваа поделба, зимата 2026/2027 година ќе трае од 1 декември 2026 до 28 февруари 2027 година.

Да потсетиме, зимското сметање на времето во 2026 година веќе започна на 25 октомври, во 3 часот наутро, кога стрелките на часовникот беа поместени еден час наназад, односно на 2 часот.