Брзото време во кое живееме секој ден со себе носи голем стрес, а нервозата на работа е неизбежна. Секој има свој најголем проблем, па вашите соговорници често ќе кажат дека работата му е најстресна. Меѓутоа, истражувањето кое траело 17 години, а во кое биле опфатени 136.000 испитаници од различни профили, покажало дека најстресната работа сепак е работата на келнер. Дејан Николиќ со оваа работа се занимава со години и се согласува со резултатите од ова истражување.
„Работата на келнер е тешка и психички и физички. Ја имаш таа смена што треба да ја направиш со ајнцер во раце и главно си на нозе цело време. Во објектот доаѓаат разни гости, секако повеќето се љубезни и воспитани, но има и такви кои се под дејство на алкохол или психички нестабилни. Некои не сакаат да си одат дома. Келнерот треба да се справи со сето тоа. Да се „справам“ со се и да се погрижиме се во кафеаната да е во ред“, објаснува Дејан.
Без разлика дали е тоа поради тешкотијата на работата, или можеби не толку добрата заработка, Дејан открива дека денес е многу тешко да се најде келнер воопшто, а само добар – тоа е веќе научна фантастика. Младите се помалку се одлучуваат да работат во оваа угостителска област.
„Платата на келнер се движи од 25.000 до 30.000 денари. Многу келнери се одлучуваат да работат само за забави, бидејќи дневниците се до 60 евра и работат само за викенд. Многу од нив се повлекуваат од работа. Келнерот пред се мора да биде љубезен, со пријатен пристап кон гостинот, но и брз за да нема долго чекање за услугата. Сето ова ја прави работата многу стресна и моите колеги ќе го потврдат тоа. Така што резултатите од гореспоменатото истражување не се изненадувачки“, заклучува Дејан.