Вкусни, крцкави и солени – за вистинските гурмани, чварките се неизоставен дел од трпезата, особено во зимскиот период. Порано биле нуспроизвод од колењето свињи, а денес, поради цената која достигнува и до 1.250 денари за килограм, се сметаат за вистински деликатес.
Истражувавме зошто ова некогашно „сиромашко јадење“ денес е толку скапо.
За квалитетни чварки, велат оние што ги подготвуваат, потребни се трпение, време и добра суровина.
– Најпрво се одвојува сланината од свињата, се става во казан, се додава околу 10 проценти вода и полека се вари – објаснува жителот на Каменица, Милан Поповиќ.
Од одгледување на свињата до готов производ поминува најмалку една година, а бројот на свињи е сè помал, што директно влијае врз цената.
– Чварките се скапи затоа што речиси никој повеќе не чува свињи по селата. Некогаш секое домаќинство имаше по две-три свињи, имаше многу маст, а свињите беа помасни – идеални за чварки. Денес, од 100 килограми сланина, ако имаш среќа, ќе добиеш само 7–8 килограми чварки – и тоа е сè – вели месарот од Каменица, Драган Благојевиќ.
Според него, луѓето денес имаат многу обврски и сè почесто се одлучуваат да купат готов производ од продавница.
Тој готов производ, пак, се плаќа најмалку 750 денари по килограм, што е слично на цената на пршутата.
– Денес сè се промени: стоката ја има сè помалку, а побарувачката е сè поголема. Подготовката трае 5 до 6 часа, а понекогаш и подолго, особено во студени денови – објаснува месарот од Ниш, Ѓорѓе Костиќ.
Чварките се многу барани – некои купувачи најпрво прашуваат за цената, додека други се интересираат за квалитетот.
– Порано, кога не се јадеа често – чварки, шкембиња – не беа на цена. Денес се модерни, а модата се следи, па затоа се и скапи – вели еден жител на Ниш.
Иако се скапи, тешко им се одолева, па често се купуваат и во помали количини. Понудата е голема, но оние што ги прават велат дека ништо не може да се спореди со домашниот производ.
– Чварката е највкусна кога штотуку ќе се извади од казанот, додека е уште жешка – заклучува Благојевиќ.