Во својата редовна колумна за Дојче веле на македонски јазик, поранешниот висок функционер на ВМРО ДПМНЕ и член на повеќе владини кабинети на Никола Груевски, Никола Тодоров, ги анализира односите во тој триаголник: Заев, Мицкоски и Апасиев.
Невозможно е ВМРО-ДПМНЕ со Мицковски на чело да го победи СДСМ, пишува Тодоров и додава:
Причината е едноставна, вели тој, Мицковски ја има поминато точката во политиката од која нема враќање назад. Неговата поддршка е забетонирана ниско, далеку пониско од вкупниот рејтинг на партијата, па не само што како лидер нема додадена вредност за партијата туку како тег ја влече надоле. Верувајте, Заев и цела влада на СДСМ можат уште милион глупости и грешки да направат и пак на избори ќе го победат Мицкоски.
Според Тодоров тоа е така, затоа што секоја грешка на власта наместо да оди на конто и во полза на опозицијата оди на конто и во корист на апатијата. И по нешто во Левица, која успешно лови по некој поен од секоја грешка на владата на СДСМ и општата недоверба во Мицкоски. Проблемот е што Левица зема несразмерно поголем дел од гласовите од ВМРО отколку од СДСМ, вели тој.
Некои анализи покажуваат дека од секој 100 нови гласа за Левица, 80 доаѓаат од гласачкото тело на ВМРО, пишува Тодоров. За ова да се случи Заев направи прилично итар политички потег и ги насочи ВМРО и Левица едни против други. Мицкоски, онака неискусен и површен, ја лапна јадицата, па сега се тепа со Левица за утешното второ место на македонската политичка сцена.
Според анализата на Тодоров, Мицкоски наместо да атакува на првото место, наместо да се обиде да ги поврати изгубените гласови на неопределените гласачи, тој ги губи и лојалните гласачи кои подолго време гласаат за десната опција.
Ова е страшна загуба, вели Тодоров, затоа што овие лојални гласачи на десниот центар, не се определуваат за друга десна партија, туку за екстремно лева партија во политичкиот спектар. Ова значи дека кога овие гласачи ќе се разочараат во Левица, а тоа ќе биде првиот момент кога Левица ќе биде дел од власта, поголемиот дел од нив полесно ќе се прешалтаат кон друга лева партија, читај СДСМ, отколку да се вратат кон десницата.