Правилната исхрана и физичката активност се клучни за здравјето. Д-р Иванов споделува совети за најдобриот извор на енергија за мозокот во текот на денот.
Д-р Драган Иванов, специјалист по интерна медицина и основач на Вегетаријанското здружение „Еден“ од Нови Сад, со децении промовира здрав начин на живот и природна исхрана. Никогаш не јадел месо и риба, а неговите совети за здравјето внимателно ги следат многумина. Во своето најново обраќање ги истакна клучните принципи за долговечност и поквалитетен живот во емисијата „Зелена училница“.
Сонот е основа на здрав организам
Еден од клучните елементи на здравиот живот е правилниот сон. Д-р Иванов нагласува колку е важно да се легнува навреме:
„Навечер треба да легнуваме навреме, особено децата и младите во пубертет. Важно е да легнат пред 22–23 часот. Кога легнуваме навреме, ќе се наспиеме, ќе се синтетизира мелатонин и тој заедно со хормонот на раст ќе го регенерира нашиот мозок и целиот организам“, вели докторот.
Како правилно да се започне денот?
Првиот оброк во денот не треба да се прескокнува, а најдобро е да започне со природни шеќери.
„Наутро, штом станеме, треба да го вклучиме мозокот. Како? Така што ќе му дадеме енергија. Најдобар извор на енергија за нашиот мозок и целиот организам се медот и овошјето. Нашиот мозок работи исклучиво на глукоза. Затоа децата не треба да одат на училиште, ниту ние да започнеме работа без да внесеме природни, непреработени јаглехидрати што ги има во медот, овошјето и интегралните житарки.“
Покрај правилната исхрана, тој препорачува на работа да се оди пеш или со велосипед, за да се спојат обврските и рекреацијата.
Зошто движењето е клучно за мозокот?
Современиот начин на живот бара многу седење, што може негативно да влијае на здравјето.
„Ако работиме седечка работа, треба да бидеме свесни дека по 3–4 часа седење, 80% од мозокот се инхибира – како да се исклучува. Треба да го прекинеме седењето и гледањето во екран или документи и да се раздвижиме 5–10 минути. Така мозокот повторно ќе се активира и работата ќе ја завршиме поефикасно.“
Д-р Иванов советува секој ден да се одвојат барем 45 до 60 минути за физичка активност и време на сонце, особено наутро и пред зајдисонце, кога се поттикнува создавање на витамин Д, како и на мелатонин и серотонин.
Исхрана и емоционално здравје – важни сојузници
За ручек, според него, идеален избор се мешунките, додека вечерата, како што вели, може и да се прескокне. Освен исхраната и физичката активност, ја нагласува и важноста на менталното здравје и меѓучовечките односи.
„Изолацијата и осаменоста, како и неспретната комуникација со луѓето, се поштетни за здравјето од тутунскиот чад.“
Тој предупредува и на прекумерната употреба на технологија кај децата, нагласувајќи дека е важно таа да се користи умерено и паметно, со повеќе внимание кон реалните односи и контактот со луѓето.
Според него, здравиот живот не бара радикални чекори, туку постепено усвојување добри навики – доволно сон, природна исхрана, редовно движење и емоционална стабилност.