На денешното рочиште за случајот „Пулс“, одбраната на првообвинетиот Дејан Јованов – Деко ја презентираше тезата дека непосредните причини за пожарот произлегуваат од постапки на музичката група ДНК, како и од недоволни институционални контроли.
Адвокатката Ивана Коцевска изјави дека пиротехниката која била користена во клубот не била пријавена и дека групата самостојно ја инсталирала и употребувала, без знаење на Јованов. Според одбраната, ниту една институција од отворањето на локалот до критичниот ден не посочила неправилности што требало да се коригираат.
Клучни тврдења на одбраната:
-
Пиротехниката била набавена и употребена без дозвола од страна на групата ДНК.
-
Јованов не бил известен за нејзината употреба.
-
Инспекциските служби не утврдиле пропусти при редовните контроли.
-
Јованов ангажирал проектантско друштво и обезбедил потребна документација: основен проект, елаборат за заштита од опасни материи, план за заштита и спасување и решение за користење на паркинг.
-
Сите документи биле доставени до општина Кочани, МВР, ДПИ и други надлежни институции.
-
Министерството за економија издавалo лиценца за работа во период од 13 години.
Став на одбраната за обвинението
Коцевска оцени дека обвинението не содржи јасна причинско-последична врска меѓу дејствијата на Јованов и пожарот, и дека ќе се докажува отсуство на свесност за какви било незаконски постапки што би довеле до последици.