Хигиеничарка во Конзулатот на Бугарија во Битола го бранува Балканот. Како што објавија бугарските медиуми, повикувајќи се на изјава на пратеник од бугарската партија Преродба, Ангел Георгиев, хигиеничарка вршела интервјуа со кандидати за добивање бугарско државјанство.
Имено, Георгиев, денеска за ова поставил прашање во бугарското собрание, поточно неговата забелешка ја пренел преку пратеничко прашање, по што вицепремиерката и шефица на дипломатијата Марија Габриел потврдила дека имало системски пропусти во бугарскиот конзулат во Битола, и дека чистачката веќе нема пристап до архивата и конзулската служба.
Според Габриел, од увидот направен во конзулатот, не биле утрдени директни докази дека чистачката ги интервјуирала кандидатите за бугарско државјанство, но потврди дека имало „застрашувачки прекршувања“ кои се недозволиви во дипломатските служби.
Габриел посочила дека 2.719 досиеја се вратени на докомплетирање во Генералниот конзулат во Битола и оти се откриени сериозни неправилности во процесот на доделување бугарско државјанство.
Случајот бил откриен откако на почетокот на февруари се појавиле извештаи за неправилности во конзулатот.
– По темелно испитување, изготвен е извештај со евалуација и анализа на собраните документи и информации, кои откриваат застрашувачки неправилности во однос на процедурите кои се критични за работата на секој конзулат, истакнала Габриел.
Пратеникот Георгиев тврди дека хигиеничарката Весна Котевска, вработена во бугарскиот конзулат вршела интервјуа со кандидати и како резултат на тоа имало многу одбивања.
Бугарското национално радио јави дека извештајот од контролата во Конзултатот во Битола е испратен до Иснпекторатот на Министерството за правда и оти се очекуваат санкции за одговорните. /Faktor