Босанец купил куќа полна со ѓубре во Германија за 3.500 евра, па нашол богатство: „Соседот ми рече внимателно да прегледам сè, можеби ќе најдам нешто — но на ова не се надевав“
Џенан Ќишиќ е навистина среќен човек. Ни самиот не можел да поверува во својата среќа која му се насмевнала дури двапати: кога случајно купил куќа за 3.500 евра и кога во неа пронашол — богатство.
Приказните за нашите луѓе кои во Германија нашле подобар живот на повеќето им звучат како бајка. Но, таа бајка навистина му се случила на Џенан Ќишиќ од Босна, кој заминал „преку граница“ во 2014 година за да заработи повеќе.
Наместо планираните три месеци, во Германија останал десет години.
Вели дека нема човек на кого не му помогнал да дојде во Германија и да се снајде.
„Првата работа ми беше на градежништво. Кога решив да одам таму, реков — немам пари, а тие ми рекоа — ќе заработиш. Немам документи — нема врска. Не знам јазик — не ти треба. Имаш грб, молчи и работи.“
Така Џенан почнал да работи на градежни објекти во Германија и самиот вели дека му било срам да каже дека во Босна свирел и работел како наставник по музика, дека е школуван музичар и свири кларинет, а во Германија работи тешка физичка работа.
„Не можев повеќе да живеам под кирија. Верата не ми дозволува да земам кредит. Решив да купам некаква рушевина, буквално што било, само да вложам во нешто свое. Но и рушевините во Германија беа скапи. Додека пребарував на интернет видов дека постојат аукции на кои се продаваат куќи.
Испратив околу 75 понуди за куќи на аукција. Колку што имав пари во кеш — толку нудев. Еден ден додека одев на работа (во меѓувреме почнав да возам трамвај) ми заѕвони телефонот. Жената од другата страна ми рече: ‘Честитки, победивте на аукцијата!’
Ја прашав дали поминала цената што ја понудив — рече да. Понудив 3.550 евра за куќа и ја добив целата — со ѓубрето, златото и сè што имаше во неа.“
Сопственичката на куќата починала и немало наследници. Куќата била празна три години и на крај било решено да се продаде на аукција. Почетната цена била околу 6.000 евра, но успеале да ја спуштат на 3.550.
„Имаше околу 40 кубици ѓубре. Но не ми пречеше, затоа што кога го расчистив — ми остана куќа. За да изградиш куќа во Германија, само дозволата чини околу 17.000 евра. Така што во секој случај бев во добивка.
Единаесет месеци чистев. За да не фрлам сè и да плаќам отпад, фотографирав и ставав на интернет — им ги подарував работите на луѓе. Ми беше важно само да се изнесе.“
Соседите му рекле внимателно да ги прегледа сите книги и предмети што останале од жената.
„Можеби има нешто,“ му рекол соседот.
„Кога ги видов првите дваесет евра во кујната — немаше посреќен човек од мене. Во една книга најдов плик со пари, а сумата беше таква што ги покрив сите трошоци. Тоа веројатно бил нејзиниот скриен заштедок,“ додава Ќишиќ.
Џенан истакнува дека ни на сон не можел да замисли дека ќе најде нешто вредно во таа куќа, но дека среќата му се насмевнала.
„Сумата беше доволна целосно да ја средам куќата и да им платам на луѓето што ми помагаа со работата.“