Милиони луѓе ширум светот купуваат брзи тестови на Ковид-19 преку Интернет и во продавници. За разлика од конвенционалните, лабораториски обработени ПЦР тестови, кои можат да откријат инфекција на почетокот на болеста, но може да поминат неколку дена пред да дојдат резултатите, брзите домашни тестови даваат резултати за помалку од 15 минути, пишува ABC News.
Многу експерти ги гледаат како клучна алатка за надминување на пандемијата, под претпоставка дека граѓаните знаат како и кога да ги користат. Експертите за јавно здравје велат дека брзите тестови се добри за голем број ситуации, вклучително и пост-симптомско тестирање и за намалување на ризикот од пренесување на вирусот на други лица, особено на децата кои сè уште не се подобни за вакцинација или на оние со поголем ризик од сериозна болест.
Можеби сме еден чекор поблиску до наоѓање живот на Марс, сугерира новото истражување
„Само во последните два месеци користев домашно тестирање за сите три главни индикации, појава на симптоми на ковид, изложеност на КОВИД и пред собирање во затворен простор со чувствителни луѓе“, рече др. Алок Пател, доцент по педијатрија на Универзитетот Стенфорд.
Тестирајте се ако имате симптоми
„Ако забележите дека нешто се променило и ако имате невообичаени симптоми, тоа е добра причина да се тестирате“, рече др. Тод Елерин, директор на Одделот за заразни болести на South Shore Health во Вејмут, Масачусетс.
Симптомите на Ковид-19 вклучуваат треска, кашлица, стомачни проблеми, болки во грлото, болки во мускулите, замор, главоболка, повраќање и дијареа. Неколку симптоми на Ковид-19 се преклопуваат со обичната настинка или грип, а единствениот начин да се открие разликата е преку тестирање. Затоа, доколку имате симптоми, останете дома и задолжително тестирајте се.
Тестирајте се за да ги заштитите другите
Дури и ако немате симптоми, тестирањето е корисно по можна или позната изложеност на вирусот, пред затворени или генерално поголеми собири, пред патување или кога се среќавате со лица со висок ризик или имунокомпромитирани лица.
„Користам тестови пред да се сретнам без маска со пријателите и семејството кои се изложени на висок ризик од хоспитализација доколку се разболат. Посебно внимавам на лицата кои се лекуваат од рак и роднините кои живеат во установи за дополнителна нега“, изјави д-р. Алиса Билински, доцент по здравствена политика на Браун, Факултетот за јавно здравје.
Некои училишта со деца кои се премногу мали за да се вакцинираат бараат неделни брзи тестови во понеделник наутро пред почетокот на училишната недела. Други училишта им дозволуваат на вакцинираните ученици да се вратат по изложувањето на вирусот користејќи брзи тестови за да се уверат дека ќе останат негативни.
Тестирајте дали сте биле изложени
„Ако сте асимптоматски, но сте биле на два метри од лице со симптоми слични на ковид или позитивен тест вкупно 15 минути или повеќе во период од 24 часа, треба да се тестирате“. рече др. Џеј Бат од семејниот христијански здравствен центар во близина на Чикаго.
Статусот на вакцинација не треба да влијае на одлуките за тестирање или толкувањето на резултатите. „Со повисоката стапка на пробив на Омикрон, тестирањето генерално се применува на сите без оглед на статусот на вакцинација“, рече д-р. Џон Браунштајн, епидемиолог на Универзитетот Харвард.
Како да ги тестирате и интерпретирате резултатите
Проверете дали вашиот домашен тест е одобрен од надлежниот регулаторен орган и точно следете ги упатствата на производителот, од складирање преку собирање примероци до датумот на истекување. Одобрените брзи тестови користат назални брисеви, но не бараат од вас да навлезете многу длабоко во носот. Некои бараат мешање на растворот и/или капнување на три, четири или шест капки на картичката, но сите се наменети за возрасни кои не се здравствени работници, пренесува Индекс.
Брзите тестови се многу сигурни ако се позитивни, но доколку забележат негативен резултат, можно е PCR тест да биде неопходен најмалку 24 часа подоцна. Значи, ако тестот е позитивен, особено ако имате симптоми, безбедно е да се претпостави дека имате ковид-19 и дека треба да бидете во изолација. Спротивно на тоа, негативните резултати може да бидат помалку точни и треба да се толкуваат со претпазливост.
Доколку имате симптоми, но тестот е негативен, можно е да е лажно негативен резултат. Негативните тестови, исто така, треба да се толкуваат со претпазливост ако сте имале контакт со ковид или можна изложеност, да речеме за време на патување.
Резултатите од брзите тестови може брзо да се променат
Во ова сценарио, од клучно значење е да се прават сериски тестови со растојание од најмалку 24 часа. Следете ги специфичните упатства за вашиот тест. Резултатите од брзите тестови може брзо да се променат, така што негативниот тест е сигурен само за осум до 12 часа. Доколку не е возможен карантин додека се тестирате во серија, носете маска и одржувајте дистанца.
Може да размислите и за ПЦР тест ако ви требаат попрецизни резултати, но имајте на ум дека ПЦР тестот може да биде позитивен до три месеци по инфекцијата и преболувањето од Ковид-19.