Многу луѓе од Балканот и понатаму веруваат дека животот во западните земји е полесен, поуреден и финансиски посигурен отколку дома.
Многу луѓе од Балканот и понатаму веруваат дека животот во западните земји е полесен, поуреден и финансиски посигурен отколку во сопствените држави. Фотографиите од патувања, социјалните мрежи и приказните за високи плати често создаваат слика за систем кој „совршено функционира“, додека секојдневните проблеми ретко се гледаат однадвор. Сепак, реалноста за оние што таму живеат со години знае да биде значително поинаква.
Токму на тоа укажа Србинката Александра Драговиќ, докторанд по астрофизика на Универзитетот во Кембриџ, која денес живее во Велика Британија. На својот ТикТок профил „astrofizičarka“ отворено зборуваше за причините поради кои смета дека животот во странство не е бајка и призна дека и самата некогаш го идеализирала Западот пред да се пресели.
„Не дека не е идеално, туку е многу лошо“
Како што објасни на почетокот од видеото, дури по неколку години живеење во друга држава почнуваат да се чувствуваат последиците од политиката, економијата и системот во кој се живее.
„Многу често слушам луѓе од Балканот како ги идеализираат западните земји, а и јас самата го правев тоа, па затоа се преселив во Британија мислејќи дека животот ќе ми биде многу подобар. Но, откако ќе поминеш одреден број години во таа држава, почнува да те погодува нејзината политика и многу други работи. Значи, ништо не е идеално. Напротив, многу е лошо“, вели таа и додава:
„Состојбата во Британија е ужасна и не сакам да останам тука. Повеќето луѓе сакаат да избегаат од оваа држава, исто како што сакаат да избегаат и од Балканот.“
Кириите и трошоците за греење ненормално високи
Александра како еден од најголемите проблеми ги наведува цените на становите, тврдејќи дека киријата ѝ ја „јаде“ речиси целата месечна плата. Без дополнителни извори на приход, вели, преживувањето е речиси невозможно. Посебно се осврна и на високите трошоци за греење.
„Цените за греење во зима се лудило. Ние не го грееме целиот стан, туку само нашата соба. Значи, не се грее дневната, не се грее другата соба, воопшто не се греат купатилата“, објаснува таа.
Според нејзините зборови, само греењето на една просторија месечно чини околу 200 фунти, додека вкупните месечни сметки достигнуваат и до 400 фунти. Додава дека купатилата воопшто не се греат, што за многумина кои размислуваат за живот во Британија е тешко замисливо, но, како што вели, тоа е реалност со која се соочуваат многу луѓе.
И јавниот превоз е проблем
Зборувајќи за јавниот превоз, таа истакна дека состојбата не е ни приближно добра како што често се мисли. Во градови како Кембриџ, каде што моментално живее, автобускиот сообраќај за време на викендите престанува уште во раните вечерни часови, па луѓето се принудени да користат такси.
„Ако сакате да се вратите дома по шест и триесет навечер, мора да земете такси. Тоа е дополнителни дваесет фунти, односно околу дваесет и пет евра“, вели Александра.
„Не ги идеализирајте западните земји“
На крајот, таа порача дека западните земји не треба да се идеализираат и дека е важно да се разговара со луѓе кои навистина живеат таму, а не да се потпираме само на туристички впечатоци.
„Политичката состојба е хаос, проблемот со илегалните мигранти исто така е хаос, иако зборот хаос не е доволно силен. Не ги идеализирајте западните земји. Разговарајте со некој што навистина живее таму и споредете го своето искуство како турист со искуството на некој што живее таму – ќе видите дека сликата е сосема поинаква“, заклучи таа.