По пандемијата, туризмот во Турција доживеа вистински бум, но сега се соочува со сериозен пад на бројот на туристи. Високата инфлација, растот на цените во угостителството и зајакнувањето на турската лира влијаат на конкурентноста, додека десетици илјади Турци избираат да одмараат на грчките острови.
Во годините по завршувањето на пандемијата со коронавирусот, туризмот во Турција доживеа вистински бум, пишува германскиот дневен весник „Frankfurter Allgemeine Zeitung“ (FAZ). Милиони Германци, Англичани, Холанѓани и Полјаци ја избираа Турција како дестинација за својот одмор.
Но, како што пишува FAZ, а пренесува „Дојче Веле“, по почетокот на агресијата во Украина, Анкара остави отворени врати за милиони Руси кои повеќе не можеле слободно да патуваат во други земји.
Сепак, оваа сезона туризмот во Турција е во криза. FAZ известува дека бројот на гости во јули опаднал за дури 5 проценти според официјалните податоци: „Особено платежоспособните Германци и Британци бараа други дестинации или останаа дома.“
Според пишувањето на FAZ, ова може да има непријатни последици за целата турска национална економија.
Турците одмараат во Грција
Како што пишува авторот на текстот, Андреас Мим, Турција веќе минатата година почнала да заостанува зад другите туристички дестинации – за многумина едноставно станала прескапа:
„Поради тоа, десетици илјади Турци го поминаа одморот на грчките острови. Во меѓувреме, кружеше гласина за повисоки цени на меѓународно ниво. Во земјата сè уште владее висока инфлација од 33,5%, каматните стапки се високи, а реалното зајакнување на курсот на турската лира ја ослабна конкурентноста на турската извозна индустрија“, наведува авторот на FAZ.
Цените во услужниот сектор неодамна пораснале за 50 проценти, што, иако е најнизок раст од средината на 2022 година, сепак покажува зголемување на трошоците во турската туристичка индустрија.
Туризмот е една од најважните економски гранки во Турција, со удел од околу 10 проценти во националниот БДП, а оваа гранка ги вработува пет проценти од турските работници. Со други зборови: што е послаба состојбата во туризмот, толку е послаба и турската економија.
Податоци за туристите
Според податоците на Министерството за култура и туризам, Турција ја посетиле 6,97 милиони туристи во јули оваа година. Повеќето беа Германци – 981.000, односно околу 55.000 помалку од претходната година. Следат Русите со 954.000, Британците со 597.000, Полјаците со 329.000 и Холанѓаните со 260.000. Сè на сè, тоа е пет проценти помалку од истиот месец во 2024 година.
Од почетокот на 2025 година, Турција ја посетиле 28,4 милиони туристи – 2,1 процент помалку во споредба со истиот период минатата година (29 милиони). Турскиот министер за туризам, Мехмет Ерсој, постави цел за оваа година од 65 милиони посетители или 64 милијарди долари приходи.
Хотелите не се задоволни
Хотелите во Аланија, популарна дестинација околу 130 километри источно од Анталија, не се сосема задоволни од бројот на резервации, пишува FAZ. Очекувањата за есенските месеци се малку подобри.
Главната причина за падот на бројот на туристи се „прекумерните“ цени, особено во рестораните. Според извештајот на FAZ, некои менаџери на туризмот од Мармарис изјавиле: „Кога посетителите плаќаат 35 долари за пар ќофтиња и 20 долари за пица, тоа има влијание на целата индустрија и на самата земја“. FAZ додава дека истиот менаџер побарал од властите да спроведат официјална контрола на цените во туристичките центри.
Некои други експерти, според FAZ, како причина за намалениот број туристи наведуваат меѓународни економски проблеми и геополитичка неизвесност. Во турската туристичка индустрија се зборува и дека некои дестинации во Грција или Шпанија станаа поевтини од Турција.