ETIAS е нова европска патна авторизација за граѓаните на 59 земји и територии за кои не е потребна виза за влез во Европа.
Од последниот квартал на 2026 година, ETIAS ќе биде задолжителен за влез во 30 европски земји за краткорочни престои.
Но, што ако имате двојно државјанство – односно, државјанство на две држави? Дали треба да поднесете барање за виза или за ETIAS, или можете да патувате без ниту едно од двете?
Одговорот зависи од државите чијшто пасош го поседувате и кој пасош ќе го користите, наведуваат од Европската Унија.
1. Двојни државјани на европска земја со ETIAS и земја без визен режим
Ако сте граѓанин на европска земја за која важи ETIAS или на Ирска, не ви е потребен ETIAS, без разлика на другото државјанство.
Во овој случај, мора да патувате со пасош издаден од таа европска земја или Ирска. Ако пасошот ви е истечен или не може да се користи, треба да се обратите кај надлежните органи на земјата што го издала пасошот, бидејќи во спротивно немате право на патување во земјите за кои ETIAS е задолжителен.
Пример:
Мария има двојно државјанство – Аргентина и Шпанија – и планира патување од Буенос Ајрес во Италија. Бидејќи е граѓанка на Шпанија, не ѝ е потребен ETIAS и мора да патува со шпански пасош.
2. Двојни државјани на две земји без визен режим
Ако имате пасоши на две земји за кои не е потребна виза, мора да поднесете барање за ETIAS. Можете сами да изберете со кој пасош ќе аплицирате.
Сепак, проверете дали пасошот ги исполнува сите пропишани услови. ETIAS е електронски поврзан со пасошот што сте го користеле за апликација, па мора да патувате со истиот пасош. Во спротивно, авиокомпанијата може да ви го одбие укрцувањето, а граничните служби – влезот.
Пример:
Денис има пасоши на Канада и Србија и планира патување во Финска. Мора да поднесе ETIAS и може да избере кој пасош ќе го користи. Ако патува со српскиот пасош, треба да провери дали ги исполнува сите услови, како што е биометриски пасош. Ако не ги исполнува, нема право на ETIAS и ќе му биде потребна виза. Наједноставна опција е да патува со канадскиот пасош, за кој може да аплицира за ETIAS.
3. Двојни државјани на земја без визен режим и земја со потреба од виза
Патниците кои имаат државјанство на една земја без визен режим и една земја за која е потребна виза, можат сами да одлучат со кој пасош ќе патуваат во 30-те европски земји за кои ETIAS е задолжителен.
-
Ако патувате со пасош на земја без визен режим, можете да аплицирате за ETIAS, доколку пасошот ги исполнува сите услови.
-
Ако патувате со пасош на земја за која е потребна виза, тогаш мора да поднесете виза, а не ETIAS.
Пример:
Лаура е граѓанка на САД и Доминиканската Република. Ако сака да патува во некоја од 30-те европски земји со американскиот пасош, мора да аплицира за ETIAS. Ако пак патува со доминиканскиот пасош, ќе ѝ биде потребна виза.