Харисон Форд на почетокот воопшто не изгледал како човек што ќе стане еден од најплатените актери во светот. Бил повлечен, скромен и со години безуспешно се обидувал да добие сериозни улоги. Повеќе од 15 години се мачел, се враќал на столарството за да го издржува семејството, па повторно се обидувал со глума.
Роден е на 13 јули 1942 година во Чикаго. Студирал англиски јазик и филозофија, но бил исфрлен од факултет поради изостаноци. Работел како доставувач, келнер, на бензинска пумпа, па дури и како готвач, пред конечно да се пресели во Лос Анџелес со сопругата во потрага по актерска кариера.
Во Холивуд заработувал скромно и повторно почнал да прави мебел. Токму тоа му го сменило животот. Додека работел како столар, го запознал режисерот Џорџ Лукас, кој му дал улога во „Американски графити“, а подоцна и во „Војна на ѕвездите“. Улогата на Хан Соло го направи светска ѕвезда. За првиот филм добил 10.000 долари, а веќе за продолжението 500.000.
Подоцна, со поддршка од Стивен Спилберг, ја доби и легендарната улога на Индијана Џонс, со што стана еден од најбараните актери во Холивуд. Филмовите во кои глумел заработиле повеќе од шест милијарди долари.
И покрај славата, Форд никогаш не сакал да глуми „совршени херои“, туку ликови со слабости и сложен карактер. Неговиот успех му донел и финансиска стабилност, но и лични турбуленции – два развода, од кои едниот бил меѓу најскапите во Холивуд.
Денес, покрај глумата, тој е лиценциран пилот и човек кој и понатаму ја сака едноставноста – работата со дрво, природата и животот далеку од холивудскиот гламур.
Неговата приказна останува доказ дека упорноста и талентот, дури и по години неуспеси, можат да донесат неверојатен пресврт.