Шефот на Службата за безбедност на Украина Иван Баканов (СБУ) синоќа потврди дека Медведчук е уапсен
Претседателот на Украина, Володимир Зеленски денеска и понуди на Русија да го размени поранешниот пратеник на партијата Опозициска платформа – За живот, Виктор Медведчук за Украинци кои беа заробени од руската армија.
Зеленски во видео обраќање рече дека Медведчук, кога го сметаат за сојузник на рускиот претседател Владимир Путин, се криел 48 дена и дека бил фатен во обид да ја напушти Украина, пренесува Интерфакс Украина.
Тој го оцени како особено цинично тоа што Медведчук користел воена камуфлажа.
– Се обиде да се облече така. Таков воин. Таков патриот. Па, ако Медведчук избрал воена униформа за себе, тогаш потпаѓа под правилата на војната – рече Зеленски.
Шефот на Службата за безбедност на Украина, Иван Баканов (СБУ) синоќа потврди дека Медведчук е уапсен.
Медведчук е во домашен притвор од мај 2021 година, од каде, како што соопшти Министерството за внатрешни работи на Украина, побегнал на 28 февруари, четири дена по почетокот на руската воена интервенција во Украина и оттогаш се води како исчезнат.
Киев го сомничи Медведчук за велепредавство и обиди за грабеж на националните ресурси на Крим, кој Москва го анектираше во 2014 година.
Во Украина важи за сојузник на рускиот претседател Владимир Путин, кога го нарекува „личен пријател“, а медиумите наведуваат и дека Путин е кум на неговата најмлада ќерка.